Xa está en marcha o Proxecto Internacional de artecorreo INCENDIOS/CONTRALUMES, vinculado a un conxunto de actividades educativas a desenvolver nos centros educativos da comarca co apoio dos concellos. A iniciativa vén de comezar e por esa razón o programa aínda está sen definir. Polo de agora tan só existe un conxunto de propostas que se están enviando ás institucións para colleitar axuda e financiación mínima.
Aparte da exposición de todas as postais recibidas, que xa estou publicando nun blog monotemático
a idea é desenvolver actividades en réxime de voluntariado nas diferentes comunidades educativas que dean protagonismo ao monte e á reflexión sobre uns usos alternativos no contexto do abandono das prácticas forestais tradicionais e das formas de vida asociadas a elas, o cambio climático e o monocultivo intensivo de madeira. É preciso, logo da última vaga de lumes que arrasou Galiza e parte da península ibérica. É urxente, se non queremos seguir sementando o abandono e o medo apocalípticos.
Comentarios
Publicar un comentario