Un par de tres / Regreso a Roda de Bará

O pasado mes de xullo fixemos unha longa viaxe en furgoneta que nos levou a Bilbao, Albi, Venecia, Eslovenia, Austria, Zúrich, Lyon, Tarragona e Ponferrada. Durante tres semanas visitamos paisaxes, museos e persoas amigas neste intenso tour que tivo como penúltima escala Tarragona, onde fomos acollidos por César Reglero e Isabel Jover e á cuxa hospitalidade se sumou con fanatismo Myriam Mercader, xs tres de Roda de Bará.



Alí pasamos dúas noites e tivemos tempo de conversar de arte e das nosas domésticas preocupacións dentro e fóra dunha piscina reparadora de tan abafante calor. Mais tamén tivemos a fortuna de ser testemuñas privilexiadas dunha exhibición privada e comentada dunha excepcional parella humanista e artística. Con calma matutina, logo do almorzo, baixamos primeiro ao taller de César e logo ao de Isa. César Reglero continúa co seu labor divulgativo e investigador do artecorreismo, da poesía visoexperimental e rodeado de libros de artista nos que leva traballando disciplinadamente desde hai máis de dúas décadas de forma destramente compulsiva. O seu gran proxecto artístico é unha gran enciclopedia de libros de artista en constante desenvolvemento denominado Prensa Gráfica Obsesiva.

O proxecto Esquecidas pola Historia, que aquí se recolle dun xeito igualmente accidental e fragmentario, xéstase no ano 2014, no Centro de Poesía Visual de Peñarroya-Pueblonuevo, en Córdoba, no que Isabel Jover presenta un libro de artista Pequeno montaxe reparador do olvido acompañado dunha ponencia sobre mulleres artistas inxustamente esquecidas polos historiadores do seu tempo. Este traballo vai desembocar nunha serie de máis de vinte retratos de artistas femeninas de diferentes épocas e países, relacionadas todas coas artes plásticas, a música ou a escritura e ignoradas pola Historia da Arte polo simple feito de seren mulleres.

Myriam Mercader Varela é unha muller sumamente entusiasta, curiosa, enérxica e creativa que naceu e se criou no Uruguai e residiu en Miami antes de chegar a España. Os seus apelidos delatan a orixe peninsular. Escritora, ensaista, poeta visual e mailartista. O seu recente proxecto, en colaboración con César e Isabel foi Mírame, revista de poesía visual e experimental. Esta especie de antoloxía por xéneros e entregas foi recompilada pola editorial Babilonia de Valencia en forma de libro con motivo da última xira europea do artecorreista xaponés Ryosuke Cohen e da súa compañeira Noriko.

Nota: as imaxes, excepto a primeira, de factura propia, foron extraídas das webs de referencia dxs autores cos seus respectivos enlaces.